Nota: Questo articolo è una traduzione in lombardo di questo articolo.
Lombardia. 1167. Per la tradizzion propi 853 agn indree i delegad di cità lombarde giuraven in Pontida, inscì de fà su la Liga Lombarda.
A l’è ‘na legenda, on mit popolar che ‘l s’è slargad in di agn del Resorgiment, ma l’è minga ‘na legenda la Liga che l’è nassuda in quei agn. L’è stada, inveci, vun di prim esempi de governo diretorial e confederal. In pratega, ‘na Svizzera.
La storia che la gh’è dree
La Lombardia, fina al 1167, a l’era s’cepada.
Ciar, la gh’haveva ‘n lenguagg in comun, ma a l’epoca el concet de nazion l’esisteva no ‘me incoeu. La Patria a l’era el liber comun.
In tra de lor Milan el s’era fad un mugg de desenemis. Tant de menà el Barbarossa in del 1162 a destrugàll, cont el jut de ‘n poo de alter cità lombarde.
I robe cambien a la svelta quand che l’Imperator l’ha tacad a volé sbassà i autonomie di comun e a domandà di tasse pussee alte. I prim a rebellàss a inn stad i veneti, che hann fad su la Liga Veronesa, poch dopo se sem rebellad nunch con la Liga Lombarda, che l’ha poch dopo ciapad dent quella Veronesa.
La prima unità lombarda
Squasi semper, in di liber de scoeula, la Liga Lombarda a l’è cuntada su a la svelta.
El par che la Liga la se fuss mituda insema domà per combater l’Imperator a Legnan el 29 de masg 1176.
A bon cunt a l’è stad no inscì. L’è vera, la Liga la fonzionava soratut a nivell militar, ma la gh’haveva anca un governo civil. ‘Sto governo chi a l’era ciamad Universitas e l’era fad su di savi nomenad di vari comun. A segonda del period istoregh el gh’haveva un gran poder o el se limitava a ratifegà i decision di comun.
A nivell ofizzial el deliberava in su di question economegh – la Liga a l’era anca ‘n union dovanala – e diplomategh, desgià che la faseva la pas e la guerra per tucc e la scerniva se fà vegnì denter di noeuv comun e se deciarà di comun amis o no. Per i comun de la Liga a l’era proibid avégh un resgior de ‘na cità desenemisa. Ma a l’era anca ‘na sorta de Cort Suprema, che la decideva in ultema istanza i question de giustizzia e la faseva de abiter in tra i comun o in tra i cittadin e i comun.
‘Sto sistema chi a l’era innovativ soratut per dò reson:
- El vedeva ‘na cession de sovranità a ‘n ent pussee gross che l’era bon de mantegnì el poder: a l’era in sostanza ‘na Confederazzion.
- La sovranità a l’era esercitada no de ‘na persona deperlee ma de ‘n collegi: a l’era donca on diretori.
A bon cunt la Liga Lombarda a l’era pussee unida de la Svizzera fina al 1848, quand che con la Guerra del Sonderbund a l’è deventada una Federazzion: el Paes elvetich el gh’haveva no un governo ma domà ‘na Dieta e gh’eren di dovane interne.
La fin de la Liga
Purtrop la Liga l’ha fornid de vességh in tra el 1250 e ‘l 1300: I lit in tra i comun, soratut Milan che l’era el ver resieta de la situazzion, gh’hann havud la mej e vist che el poder imperial, soratutt cont i garanzie de la Pas de Costanza, a l’era pu vist ‘me ‘n gran pericol, i lombard han preferid resià in tra de lor e quella roba chi l’ha menad al nassiment di Signorie.
Tucc i foto a inn ciapade de la Wikipedia.
